移民後 又搵工，又中covid 所以停操咗一年 . 為咗唔可以俾自己停落嚟，所以舊年年底開始有咩比賽都會報咗先。一來真係唔覺得有咁好彩，二來，倫敦同栢林兩個都係6 大馬拉松之一，所以我同好多人一樣，會習慣報曬兩個先。點知.... 真係咁好彩地中曬😜，但係真係無為意係兩個賽係隔得咁近, 今年一月知道栢林馬中咗，再到今年三月收到倫馬話我中埋, 再check 日子, OMG, 係連馬. 不過同自己講，栢林馬可以練下做下時間. 倫馬係自己屋企嘅比賽, fun run 就得。咁樣，就開始咗呢個星期嘅奇妙之旅.
栢林馬我估好多人都分享咗，所以想由另一個方向分享下。就係我係點48 小時快閃栢林馬。
首先，由屋企出發, 最平嘅方法由倫敦去栢林一定係坐budget airline. 我就㨂咗easy jet, 為咗盡量唔請假同可以用最短時間來回栢林同倫敦，我就㨂咗星期六朝早8 點幾 由GATWICK airport 上機🛫。計過如果嗰朝call 車去, 要至少£80, 仲未計番嚟嗰轉，咁就決定揸車去泊long stay parking, £48 搞掂，泊咗車就用接駁巴士往返機場. 個半鐘機就到栢林機場🛬.
栢林馬最好係比賽期間，市內免費坐公共交通公具, 所以交通費又慳返。Download 定張電子車飛，就可以就咁行入車廂好方便。
去到EXPO同班長會合，行咗一陣然後就去airbnb 攞房，再去同班長、Joanne 佢地食飯。食完飯就返去訓覺。
我係最後一組出發，又揀咗唔洗寄行李，所以第二朝唔洗太早起身。係麥記食咗早餐，再攞定個包上車就去起步集合點。栢林坐地鐵搵路 Google Map 都好可靠。但其實係月台都預到好多一睇就知會去馬拉松嘅跑友，所以要去邊個月台上車，幾時轉車，主要都係跟其他人睇電話都可以慳返。
跟住指示去到起步點集合嗰時，KIPCHUGI 都已經跑到一半，仲話再快過對上一次個WR。大家都起興奮. 比起其他比賽，栢林馬嘅起步都算做有心思，好似UTMB 起步咁，每一組時起步前，大會主持都會同大家一齊拍手，而拍手嘅方法同用嘅音樂，每組都唔同好好玩。
到我嗰組起步，沿路可以睇到好多栢林嘅特色建築 ，好多都好高同好宏偉。跑嘅通常都係三四條行車線咁闊嘅馬路，係人同人之間穿插時都唔太難. 為咗唔令自己第一隻跑爆咗而跑唔到倫敦嗰場。我都係跟住先前係隻錶度set 咗嘅HR Zone 跑, keep 住個zone 跑，就唔會爆. 不過真係操練唔夠，20K 後想加快少少，隻錶己經開始出alert. 咁無計啦，唯有放鬆easy 跑。最後完成到，仲要唔係想像嘅差時間，所以已經好滿足。
跑完第一件事係即刻攞啤酒飲，呢隻無酒精嘅啤酒又幾好飲喎。之後就返去airbnb 沖涼大覺訓，食麥記再再訓多震。我回程班機係朝早7 點機，照計應該要5 點鐘到機場. 但免費車飛零晨3 點就會失效. 所以為咗慳返夜晚嗰轉的士錢，我就決定早啲退房，夜晚11 點就出機場。去到機場其實已經收曬工，係個角落頭搵張長櫈訓覺，訓到機場開返就入閘上機返屋企。咁就結束咗我個 快閃栢林馬之旅。
